Ова е втор пат од осамостојувањето на државата да имаме двоцифрена стапка на инфлација. Прв пат двоцифрена инфлација имавме во време на владата на Љупчо Георгиевски. Според експертите, двоцифрените стапки на инфлација го осиромашуваат народот и не водат во просперитет. Се смета дека најоптимални услови за забрзан стопански раст постојат во услови на ниска, стабилна, едноцифрена стапка на инфлација.

Вицепремиерот Зоран Ставрески пред неколку дена укажа дека стапката на инфлација до 7 отсто не е загрижувачка, што укажува дека десетпроцентна инфлација треба да го запали црвеното светло на тревога на надлежните.

„Ставрески кажа дека до 7 проценти не е опасна инфлација, што значи дека 10 проценти е веќе опасна инфлација и факт е дека ние веќе живееме во двоцифрена инфлација. Мој став е дека инфлација во Македонија поголема од вообичаената, односно поголема од 1 до 3 проценти, е проблематична. Нашата земја има фиксен девизен курс врзан за еврото и секоја повисока инфлација е опасна, особено за извозниот сектор. За оваа инфлација од 10 отсто само слепа влада може да тврди дека не е проблематична“, вели ексминистерот за финансии, Никола Поповски.

Народна банка на Македонија, која заедно со Министерството за финансии е задолжена за одржување на макроекономската стабилност, предвидува стапка на инфлација од 6 до 7 отсто, што е повисока дури и од предвидувањата на Меѓународниот монетарен фонд, кој планираше 4-5 отсто стапка на инфлација. За разлика од нив, експертите предвидуваат дека годишната стапка на инфлација ќе порасне до 9-10 отсто до крајот на годинава, што ги потврдува црните прогнози за висок процент на инфлација што ќе го имаме годинава, што најмногу ќе го почувствуваат и ќе ги погоди граѓаните. Со ваков процент на инфлација Македонија се доближува до стапките на инфлација регистрирани во регионот, како што е во Србија, која во март имала инфлација од 11,8 отсто.

Според последните статистички податоци, трошоците за живеење во Македонија во март пораснале за 10,2 отсто, а индексот на цени на мало за 8,0 отсто, во споредба со истиот месец лани. Индексот на цените на мало во март 2008 година, во однос на претходниот месец, пораснал за 0,7 отсто, а индексот на трошоците за живеење за 0,8 отсто.

Најзаслужно за ваквиот процент на покачување на цените во март во споредба со февруари се повисоките цени на овошјето за 15 проценти и на нафтените деривати за 4,1 отсто. Намалување е регистрирано кај цените на лековите, и тоа за 8,9 отсто.

Вредноста на потрошувачката кошница за исхрана и пијалаци за едно четиричлено домаќинство за март 2008 година, пресметана врз основа на цените на мало, изнесува 12.332 денара и во однос на претходниот месец е повисока за 1,3 отсто.