Грчкиот весник “Елефтерос типос“ пишува дека премиерот на Грција Костас Караманлис, и покрај јасните намери на САД спорот со името на Македонија да се реши пред изборите кај нас, не покажува подготвеност лично тој да земе учество во процедурата.

Запрашани дали средба меѓу Караманлис и специјалниот посредник на ООН, Метју Нимиц, е веќе закажана за во петок во Атина, соработниците на премиерот велат дека “нема такво нешто“.

Според дипломатите, за очекување и разбирливо би било Нимиц да сака средби на највисоко можно политичко ниво. Сепак, изгледите се дека средба ќе има само со грчката министерка за надворешни работи, Дора Бакојани.

“Посредникот на ООН сака да ги проучи намерите на властите по наложеното вето од Грција на членството на Скопје во НАТО. Се претпоставува дека тој ќе даде нов предлог за сложено име, најверојатно “Нова Македонија“, на средбата што ќе ја има со преговарачките екипи на двете држави по Велигден. Во Кабинетот на Караманлис знаат дека парламентарните избори во ПЈРМ ја прават невозможна промената на ставот, за да има гаранции за наоѓање на компромисно решение“, пишува “Елефтерос типос“.