Според Нетпрес, српската компанија “Електромрежа на Србија“ за две недели ќе почне со изградба на далекувод од Ниш до Македонија, кој ќе обезбеди сигурен пренос на струја во целиот регион, кој инаку се соочува со недостаток на електрична енергија.

Генералниот директор на електрокомпанијата од Србија, Милош Миланковиќ, изјавил дека изградбата на  далекуводот ќе заврши за 18 месеци, објави Нетпрес повикувајчи се на новинската агенција Бета.

Миланковиќ оценил дека изградбата на тој далекувод е исклучително важна бидејќи ќе обезбеди сигурно снабдување со струја во регионот, кој има недостаток од електрична енергија. Според него тоа посебно се однесува на Македонија, на Албанија и на Грција.

“Во изградбата ќе бидат вложени 31 милион евра, од кои 21 милион се донација на Европската унија, реализирани преку Европската агенција за реконструкција. Со изградбата на новиот далекувод и новите трафо станици во Јагодина, Сремска Митровица, Сомбор и Белград, губитокот во преносот на струја ќе се намали на ниво кое го имаат електропреносните системи во развиените западноевропски земји. Србија е многу значајна во електроенергетскиот систем во Европа, има голем број граници и е поврзана со 16 електроенергетски системи“, рекол Миланковиќ.