По средбите со претставници на државата, дипломатскиот кор и деловните партнери на банката, првиот потпретседател Варел Фриман изрази надеж дека соработката со локалните власти ќе биде успешна. „Очекуваме ЕБОР наскоро да биде поканета да учествува во финансирањето на изградбата на најмалку еден значаен автопат во Македонија“, изјави Фриман, не откривајќи детали.

Тој, исто така, побарал и компаниите и властите во Маекдонија да покажат интерес за соработка со ЕБОР, за нејзиното присуство во земјата да покаже ефекти. „Ова е навистина интересно време за Македонија и тоа го признаваме. Но, исто така, е важно да се признае дека ЕБОР е институција којашто има долгорочна обврска кон економската транзиција на Македонија, како и обврска за зајакнување на поддршката на приватниот сектор во земјата“, го цитира Утрински.

Освен во поголеми проекти, Европската банка најави и подготвеност за поддршка на развојот на локални компании во приватниот сектор, привлекување странски инвестиции, како и работење со финансискиот сектор со цел да се помогне во развојот на малите банки.