Тиквеш е единствена од Југоисточна Европа

Винарската визба „Тиквеш“ е избрана меѓу 30-те водечки глобални вински брендови на еден од најзначајните и најпознати светски саеми за прехранбена индустрија – СИАЛ (www.sial.fr)  во Франција.

Според зборовите на одговорните луѓе од СИАЛ, „Тиквеш“ го заслужи своето место во друштвото на водечките светски винарии „поради иновативниот приод во работењето, постигнатиот комерцијален успех и додадената вредност која придонесува кон стимулирање на пазарот на вино“.

Во групата 30 топ светски винарии, покрај „Тиквеш“, која е единствена од Југоисточна Европа, се наоѓаат и 16 вински брендови од Франција, три од Австралија, по два од Германија и Аргентина и по еден од Португалија, Шпанија, Италија, Нов Зеланд, Чиле и Кина.

- Голема чест е да бидете дел од светската винска елита. Тоа е најсилна верификација за сите наши досегашни напори и вложувања во развојот на винскиот бизнис и култура, не само во Македонија, туку и глобално. Ова е и дополнителен поттик и енергија да продолжиме со создавање вина со врвен квалитет, рече Ѓорѓи Петрушев, генерален директор на „Тиквеш“, на претставувањето на водечките светски вински брендови што се одржа во рамки на СИАЛ.

На презентацијата, „Тиквеш“ ги претстави уникатните врвни македонски вина Вранец и Темјаника од сериите Special Selection и Limited Edition.

Учеството на саемот СИАЛ во Франција беше искористен и за остарување деловни контакти и размена на искуства со голем број претставници на светската винска индустрија. Претставниците на „Тиквеш“ и на останатите водечки светски винарии во групата ТОП 30, се договорија идната година во Париз да одржат заеднички состанок на кој ќе се сумираат најновите достигнувања и ќе се постават иднините трендови во светската винска индустрија.

(Сител)