Грчките сточари, противејќи се на увозот на јагнешко и друго месо од Македонија, ја блокираа границата. Нивното објаснување е дека таквиот увоз го загрозува пласманот и цените на нивните производи, јавува Вечер.

Трговската ’војна’ меѓу Грција и Македонија се разгорува. Ова е втор удар за македонските сточари во рок од неполни две седмици. Кога минатиот пат властите во Грција ги стопира македонските јагниња - во екот на сезоната пред Велигден - во македонските трла останаа околу 60 илјади непродадени јагниња, ја пренесува веста дневникот Вечер.

Македонското Министерство за земјоделство излезе со тврдење дека не се работи за стопиран, туку за намален извоз на грчкиот пазар. Портпаролка на Министерството, Соња Трајкова, ја информираше јавноста дека веќе е најден алтернативен пазар за јагнешкото месо.

„По непосредните интензивни контакти на Министерството и на ветеринарните управи на Македонија и на Србија, од петокот македонското јагне се извезува на српскиот пазар. Ова е првпат македонското јагне да се најде на овој пазар наместо да транзитира до пазарите во Хрватска и во Италија и да се извезува во Грција. Во следните неколку дена до велигденските празници, извозот ќе се реализира континуирано со најмалку осум пратки“, се вели во соопштението на Министерството за земјоделство.

според македонските власти, грчките сточари и кланици, всушност, го користат тековниот спор со името како парава, а во суштина се плашат дека, поради конкурентноста на македонското јагнешко месо, нивната заработка може значително да се намали.  Грчките сточари бараат трговците да им платат повисока цена за јагнешкото месо од сегашната - дури пет евра за килограм. Во спротивно, најавени се порадикални протести и демонстрации за денеска и за утре.