По се изгледа дека спорот за името со Грција ќе прерасне во пречка и за преговори со Европската  Унија. Според Телевизија А1, тоа е еден од клучните амандмани од извештајот за Македонија, кој утре се очекува да се изгласа во Европарламентот во Стразбур.

Во амандманот, наводно, се вели: „Македонија и Грција треба да дојдат до решение, за ова прашање да не продолжи да биде пречка за членство на ФИРОМ во меѓународните организации“.

Овој амандман е практично еден од најважните во овој контекст и токму околу него се кршеа копјата, зашто се повикува на времената спогодба. Пред две недели, гласањето за истиот беше одложено.

Борбата на Грција беше исфрлање на референцата на времената спогодба. Сепак, ова е крајно неповолно, затоа што предусловот за преговори со Унијата кој ќе се дефинира со ваквиот амандман е единствено решение за спорот.

Донекаде загрижува амандманот на социјалистите, пренесува А1, зашто со него се бара од владината коалиција да обезбеди фер и демократски избори. Вешто осмислен, и за овој амандман се очекува да биде усвоен денес. Тој се повикува на Уставот и изборниот законик.

Гледано од овој аспект, постои уште еден проблематичен амандман, кој, исто така, ги врзува датумот за преговори со изборите и со кој од Советот на Унијата се бара на следниот самит да го разгледа исполнувањето на критериумите и, ако постојат услови за тоа, да препорача датум за преговори.

Самитот, меѓутоа, е закажан за 13-ти и 14-ти јуни, период во кој македонија се уште ќе нема формирано Влада. Со кого ЕУ ќе договори дата за почеток на преговорите?