|
 Сите стопанственици се контра примената на патриотски фискални сметки, но Владата упорно опстојува во намерата за нивно задолжително имплементирање до почетокот на јули годинава, јавува Утрински весник.
Ова е една од ретките прашања кои ги обединија дури и двете стопански комори, кои обично не се поклопуваат во своите ставови. Минатата недела, Стопанската комора на Македонија побара од Владата да го стопира процесот на воведување на патриотските сметки или Министерството за финансии да ги покрие трошоците за софтверската надградба на касите. Сојузот на стопански комори не излезе со свое конкретно барање, но се изјасни против ваквата акција, иако премиерот Никола Груевски на средбата со членовите на ССК мислеше дека тие ќе застанат на негова страна, како што досега го поддржуваа во сите одлуки. „Сојузот на стопански комори не ја одобрува оваа новина, бидејќи не е во функција на економијата и не може да придонесе за некакви позитивни резултати“, ја пренесува Утрински изјавата на претседателот на ССК Венко Глигоров. Премиерот, пак, потсетува дека слична практика постои и во други земји, како што е Ирска. Неговото објаснување на идејата е дека, на овој начин, граќаните ќе имаат увид колку пари трошат за купување домашни производи. Главнито аргумент на трговците е дека тоа повторно ќе биде на грбот на граѓаните, зашто ќе доведе до нов бран поскапувања на храната. Затоа, тие бараат Владата и Министерството за финансии да ги платат трошоците за измената на фискалните каси, сметајќи дека дека ниту можат, ниту, пак, е в ред тие да го сносат трошокот за новото фискализирање кое треба да стапи во сила до јули. „Цехот за патриотските сметки треба да го плати Владата, Министерството за финансии или домашните производители, чиј бизнис ќе се стимулира со новите фискални сметки. Во спротивно, во повеќето трговски маркети товарот ќе го понесат потрошувачите преку покачените цени“, Утрински ги цитира трговците. Математиките покажуваат дека трговците за нова фискална меморија ќе треба да издвојат од 4,800 денари до 15,000 денари само за една каса, зависно од видот на апаратите. Се проценува дека надградба на фискалните каси најмногу ќе ги погоди дуќанчињата, но и големите маркети, кои имаат повеќе од 90 фискални апарати. Според сервисерите, трговците кои плаќаат редовно одржување на фискалните апарати ќе платат 50 отсто помалку од редовната цена потребна да се плати за вградување на новиот софтвер, но, сепак, тоа ќе биде трошок и за фирмите и за нив. Според сервисерите, само 10 отсто од фирмите плаќаат за редовно одржување на фискалните апарати, што значи дека сите други ќе треба да ја платат целата сума за надградувањето, коментира весникот. На крајот, истакнува дека против ваков вид ’патриотски’ сметки, во принцип, се и Светската трговска организација и Европската унија.
|
