Сончогледот повторно ќе се сее на македонските ниви. Иницијативата за враќање на оваа индустриска култура ја покрена велешката фабрика за масло „Благој Ѓорев“, која е и единствен преработувач на сончогледовото семе во нашата држава, а ја поддржа и Министерството за земјоделство, јавува ТВ Сител.

По веста дека велешката фабрика на земјоделците им гарантира квалитетен семенски материјал и откуп на сончоглед по цена од 22 денари за килограм, во „Благој Ѓорев“ се пријавија повеќе индивидуални производители, од битолскиот и од прилепскиот крај.
Од „Благој Ѓорев“ најавуваат дека ќе бидат обезбедени и пари за транспортните трошоци од нивата до фабриката.
- Интерес за сеидба на сончогледот и за склучување на договори досега пројавија над 600 индивидуални производители. Задоволни се од понудената гарантирана откупна цена и од обезбедувањето на квалитетен семенски материјал. Оваа пролет ќе бидат засеани повеќе од 5.000 хектари, вели Златко Николовски, раководител за обезбедување на суровини во велешката фабрика.
Тој верува дека до крајот на април, кога ќе почне сеидбата, бројот на заинтересираните земјоделци ќе биде поголем. - Кога на ова ќе се додадат и површините што во скоро време треба да ги договориме со Комбинатите и земјоделските задруги оваа пролет очекуваме на полињата во Македонија да бидат посеани над 10.000 хектари од кои фабриката планира да откупи околу 15.000 тони квалитетно сончогледово семе, вели Николовски.
Оваа иницијатива беше покрената бидејќи Македонија секоја година за купување на сурово масло плаќа големи девизи иако во нашата држава постојат идеални услови за одгледување на сончогледот. Во 1986 година на полињата во Битолско, Скопско, Прилепско, Кумановско, Овчеполието и во други региони сончогледот беше застапен на површина од над 30.000 хектари.

Веста е преземена од ТВ Сител.