Со минус од 4.09 отсто, вреднсота на МБИ 10 се намали на 2.731,67 индексни поени, што е најниско ниво на индексот забележано оваа година, но и многу пред тоа. Индексот МБИД се намали за 2.66%, на 3.067,98 поени, а пак ОМБ има минимален пад од само 0.02% на 104,77 поени.

Првиот половина час прометот изнесуваше над 7 мил.ден, од кои 5 мил.ден ги оствари акцијата на Благој Ѓорев, чија вредност остана без промена. На крај од тргувањето, сепак првата позиција како најтргувана акција по промет ја завзема Комерцијална банка која исто така оствари промет од 5.6 мил.ден.

Едвај, три хартии од вредност го завршија денешното тргување во позитива. Во главно, беше лош ден за инвеститорите, со далеку поголем број на губитници во однос на добитници. Единствено во плус денес беа акциите на Жито Лукс со 3.17%, потоа обврзницата РМДЕН06 со полет од 1.05%, и на крај од тргувањето акцијата на ОХИС успеа да го оправда и продолжи вчерашниот пораст, па во таа насока денес додаде минимални 0.48%, зголемувајќи ја просечната цена на 211,00 ден.

Меѓу најголемите губитници се најде УНИ Банка, која потона за 29.80%, на 1.100,00 ден. Поголем пад имаа приоритетните акции на Стопанска банка Скопје како и КЈУБИ со пад од 10 и 9.73%, соодветно.

Во услови на пад на нафтата и нафтените деривати на глобалните пазари и во малопродажбата во земјата, како и по објавената загуба од околу 300 милиони денари пред оданочување по третиот квартал,  единствената рафинерија во земјата ОКТА АД (МСЕ: ОKTА) утринава акцијата загуби дури 7.78%. Оваа акција се тргуваше по просечна цена од 4.150,00 ден., поминаа 45 акции.

Вредноста на фармацевтската компанија веќе четврти ден по ред се намалува, денес има пад од 6.80%, на 4.172,28 ден. Намалување на вредноста од над 5 отсто имаа акциите на Макпетрол, Фершпед и Тутунска банка, додека пад од повеќе од 4% имаа акциите на Топлификација и Комерцијална банка.