| Штрабаг и Алпине сакаат да ги санираат македонските патишта
|
Штрабаг на рускиот милијардер Олег Дерипаска и австрискиот гигант Алпине бау сакаат да ги санираат старите македонски патишта.Овие две компании се јавија на тендерот за реконструкција на 11 патишта низ земјава кои претходно беа оценети како најлоши.
Покрај двете големи странски фирми на тендерот се јавија уште четири домашни и тоа Илинден од Струга, Гранит, Пелагонија инженеринг и Ингра, новиот газда на Маврово.
Владата парите за санацијата на овие патни правци ги обезбеди преку заем од Светската банка во висина од 35 милиони евра.
Станува збор за 288 километри делници низ цела држава. Најголема е делницата Макази - Долно Дупени на грчка граница од 37,5 километри, како и Струмица - Дојран исто така до границата со Грција во должина од 31 километар. Изградбата на патиштата ќе трае една година од потпишувањето на договорите со фирмата која ќе го добие тендерот.
Со овој тендер за санација на регионалните патишта, започнува еден од најважните проекти за оваа Владата, подобрување на инфраструктурата во земјава. Во тек е и еден од најкрупните проекти, за концесија на уште 7 делници во должина од 560 километри низ целата држава. На огласот за интерес за овој проект се јавија 48 компании од странство. До Нова година ќе биде распишан и тендерот на кој ќе бидат поканети компаниите кои ќе ја поминат предквалификацијата. (Сител телевизија)
|
